امریکی حملوں میں صرف ایرانی عسکری تنصیبات کو نشانہ بنایا گیا: وائٹ ہاؤس

ایران کے پلوں اور دیگر شہری انفراسٹرکچر پر امریکی حملوں کے بعد دونوں ممالک کے درمیان شدید لفظی جنگ شروع ہو گئی ہے۔ ایران کی وزارتِ خارجہ کے ترجمان اسماعیل بقائی نے سوشل میڈیا پلیٹ فارم ایکس (ٹویٹر) پر امریکا پر کھلی جنگی جارحیت کا الزام عائد کرتے ہوئے کہا کہ واشنگٹن نے شہری تنصیبات کو نشانہ بنا کر اور بے گناہ شہریوں کو قتل کر کے ایک اور سنگین جنگی جرم کا ارتکاب کیا ہے، جو بین الاقوامی قوانین کی صریح خلاف ورزی ہے۔ دوسری جانب ان الزامات اور جنگی جرم کے خدشات کو مسترد کرتے ہوئے وائٹ ہاؤس کی ترجمان اینا کیلی نے مؤقف اختیار کیا ہے کہ امریکی فوج نے صرف اور صرف فوجی اہداف کو نشانہ بنایا ہے۔ ترجمان نے الٹا ایران پر الزام لگایا کہ اس نے آبنائے ہرمز میں شہری جہازوں اور بے قصور ہمسایہ ممالک کو نشانہ بنایا ہے۔ انہوں نے بتایا کہ امریکی صدر ڈونلڈ ٹرمپ نے سینٹرل کمانڈ کو ہدایت جاری کر دی ہے کہ وہ ایران کی حملے کرنے کی صلاحیت کو محدود کریں اور ایرانی حکومت کو اس کے اقدامات پر جوابدہ ٹھہرائیں۔