واٹس ایپ اور بینک اکاؤنٹس ہیکنگ میں اضافہ، این سی سی آئی اے کا الرٹ

نیشنل سائبر کرائم انویسٹیگیشن ایجنسی (این سی سی آئی اے) کے ڈائریکٹر جنرل خرم علی نے پاکستان میں واٹس ایپ اور بینک اکاؤنٹس ہیک ہونے کے بڑھتے ہوئے واقعات پر تشویش کا اظہار کرتے ہوئے خبردار کیا ہے کہ انٹرنیٹ اور موبائل فون کے بڑھتے استعمال کے باعث آن لائن فراڈ میں اضافہ ہوا ہے۔ میڈیا سے گفتگو کرتے ہوئے انہوں نے بتایا کہ ان جرائم سے نمٹنے کے لیے ایک جامع ایکشن پلان تیار کر لیا گیا ہے، جس کے تحت متاثرین کی فوری مدد اور اکاؤنٹس کی بحالی کے لیے جلد ایک خصوصی ہیلپ لائن قائم کی جائے گی۔ ڈی جی نے مزید کہا کہ میٹا (Meta) کے تعاون سے مقامی زبانوں میں عوامی آگاہی مہم شروع کی جا رہی ہے۔ انہوں نے انکشاف کیا کہ بین الاقوامی تعاون سے کئی سائبر کرائم گینگز کو گرفتار کیا جا چکا ہے اور او ٹی پی (OTP) کے غلط استعمال کو روکنے کے لیے جدید ٹیکنالوجی پر کام جاری ہے۔ انہوں نے عوام کو سختی سے ہدایت کی کہ وہ اپنا خفیہ او ٹی پی کوڈ کسی سے شیئر نہ کریں کیونکہ یہ ہیکنگ کی سب سے بڑی وجہ ہے۔