اسجد اقبال اسنوکر ورلڈ کپ کے کوارٹر فائنل میں رسائی، محمد آصف ایونٹ سے باہر

پاکستانی کیوِسٹ اسجد اقبال نے شاندار کارکردگی دکھاتے ہوئے آئی بی ایس ایف اسنوکر ورلڈ کپ کے کوارٹر فائنل میں جگہ بنالی، جبکہ محمد آصف سخت مقابلے کے بعد ایونٹ سے باہر ہوگئے۔

مسقط (عمان) میں جاری ورلڈ کپ کے پری کوارٹر فائنل میں اسجد اقبال نے مصر کے منیٰ اعواد کو 1-4 فریم سے مات دیتے ہوئے ٹاپ ایٹ میں رسائی حاصل کی۔ اسجد نے ایونٹ میں اپنا دوسرا سنچری بریک بھی اس میچ میں کھیلا، جو ان کی شاندار فارم کی واضح دلیل ہے۔

دوسری جانب محمد آصف کو پری کوارٹر فائنل میں فرانس کے نکولس نورٹریوکس نے 2-4 فریم سے ہرا کر ٹورنامنٹ سے باہر کردیا۔
اس سے قبل آصف نے یو اے ای کے خالد کمالی کو سخت مقابلے کے بعد 2-3 سے شکست دے کر اگلے مرحلے میں جگہ بنائی تھی۔