وزیر خزانہ کی ایشیائی انفراسٹرکچر انویسٹمنٹ بینک کی صدر سے ملاقات، توانائی، ریلوے منصوبوں پر گفتگو

بنکاک میں ایشیائی انفراسٹرکچر انویسٹمنٹ بینک (AIIB) کے اعلیٰ سطح کے اجلاس کے موقع پر وفاقی وزیر خزانہ و محصولات سینیٹر محمد اورنگزیب نے بینک کی صدر زو جیائی (Zou Jiayi) سے ملاقات کی، جس میں پاکستان کے بنیادی ڈھانچے (انفراسٹرکچر) کی فنانسنگ اور معاشی استحکام سے متعلق امور پر تفصیلی تبادلہ خیال کیا گیا۔

ملاقات کے دوران قومی اہمیت کے منصوبوں بالخصوص بجلی کی ترسیل کے نظام (Electricity Transmission System) اور پاکستان ریلوے کی جدید کاری کو ترجیحی شعبے قرار دیا گیا۔ اے آئی آئی بی کی صدر نے اعلان کیا کہ بینک جاری سال 2026 کے اختتام سے قبل بجلی کی ترسیل کے اہم منصوبے کی منظوری کا ہدف مکمل کرے گا۔ اس کے علاوہ ایم ایل ون (ML-1) ریلوے منصوبے کے کراچی تا روہڑی سیکشن کے لیے ایشیائی ترقیاتی بینک (ADB) کے ساتھ مشترکہ مالی معاونت اور دیگر حصوں کے لیے متوازی فنانسنگ کے امکانات کا جائزہ لیا گیا۔

وزیر خزانہ محمد اورنگزیب نے پانڈا بانڈ (Panda Bond) کے اجرا کے لیے کریڈٹ گارنٹی کی فراہمی میں اے آئی آئی بی کے تعاون کو سراہا اور پاکستان کی معاشی حکمت عملی پر روشنی ڈالی، جس کا مقصد مالی وسائل میں تنوع لانا اور قرضوں کی مدت میں توسیع فراہم کرنا ہے۔ انہوں نے مستقبل میں بین الاقوامی کیپٹل مارکیٹ تک رسائی اور یورو بانڈز کی ٹوکنائزیشن (Tokenization of Eurobonds) کے لیے اے آئی آئی بی کی جانب سے تکنیکی اور مالی معاونت کی آمادگی کا خیرمقدم کیا