سابق آسٹریلوی کرکٹر بریٹ لی کا دبئی میں مستقل سکونت اختیار کرنے کا اعلان

آسٹریلیا کے سابق فاسٹ باؤلر بریٹ لی نے دبئی میں مستقل سکونت اختیار کرنے کا اعلان کر دیا ہے۔

بریٹ لی نے سوشل میڈیا پلیٹ فارم انسٹاگرام پر اپنے مداحوں کو اس اہم فیصلے سے آگاہ کرتے ہوئے بتایا کہ ابتدا میں دبئی کے چند دورے صرف کام کے سلسلے میں تھے، تاہم وقت کے ساتھ یہ مواقع بڑے پیشہ ورانہ امکانات میں تبدیل ہو گئے، جس کے بعد انہوں نے دبئی کو اپنا نیا گھر بنانے کا فیصلہ کیا۔

ان کا کہنا تھا کہ دبئی اب ان کی زندگی کا اہم حصہ بن چکا ہے، جہاں نہ صرف پیشہ ورانہ ترقی کے بے شمار مواقع موجود ہیں بلکہ ایک متوازن اور پُرسکون طرزِ زندگی بھی میسر ہے۔

سابق فاسٹ باؤلر کے مطابق دبئی میں انہیں بہترین لوگوں سے ملنے، نئے مواقع حاصل کرنے اور خاندان کے ساتھ زیادہ وقت گزارنے کا موقع ملا۔ انہوں نے کہا کہ شہر کی توانائی اور ترقی کا جذبہ انسان کو آگے بڑھنے کا حوصلہ دیتا ہے۔

بریٹ لی نے خاص طور پر اپنے بچوں کے حوالے سے اطمینان کا اظہار کرتے ہوئے بتایا کہ دبئی میں تعلیمی اداروں کا معیار بلند ہے اور کھیلوں کی سہولیات ہر جگہ دستیاب ہیں، جو بچوں کی شخصیت سازی میں اہم کردار ادا کر رہی ہیں۔ ان کے مطابق خاندان کے لیے یہ ماحول نہایت موزوں ثابت ہو رہا ہے۔

انہوں نے آسٹریلیا سے اپنی وابستگی کا ذکر کرتے ہوئے کہا کہ اپنے وطن کو گھر کہنا ہمیشہ باعثِ فخر رہے گا اور وہاں کی یادیں ان کے دل کے قریب رہیں گی، تاہم ان کے بقول دبئی کا مثبت ماحول اور امکانات انہیں اس شہر سے خاص طور پر جوڑے ہوئے ہیں۔