گورنر شپ نہ ملنے پر ایک سیاسی جماعت کے سربراہ شدید ناراض ہیں: محسن نقوی

وفاقی وزیر داخلہ محسن نقوی نے لاہور میں صحافیوں سے غیر رسمی گفتگو کرتے ہوئے کہا ہے کہ گورنر راج اور گورنر شپ نہ ملنے پر ایک سیاسی جماعت کے سربراہ شدید ناراض ہیں، تاہم ماضی میں دہائیوں تک اسٹیبلشمنٹ کے سہارے سیاست کرنے والے اور ہوائی ٹکٹ تک بنوانے والے سیاستدانوں کو دوسروں پر الزام تراشی زیب نہیں دیتی۔ انہوں نے کہا کہ خیبر پختونخوا اور سابق فاٹا کے وسائل پر سیاست کرنے کے بجائے حقائق کی بنیاد پر بات کی جائے، کیونکہ ماضی میں فاٹا کے جائز حقوق کی غصب ورزی پر خاموش رہنے والے آج سیاسی مفادات حاصل کر رہے ہیں۔ وزیر داخلہ نے زور دیا کہ خیبر پختونخوا اس وقت سنگین سیکیورٹی چیلنجز کا شکار ہے، لہٰذا سیاسی رہنما آگ بھڑکانے اور انتشار پھیلانے کے بجائے صوبے میں امن و امان کی بحالی اور دہشت گردی کے خاتمے میں اپنا مثبت کردار ادا کریں۔