افغان طلبہ کا میڈیکل کالجوں سے اخراج کا معاملہ: لاہور ہائیکورٹ کی حکمِ امتناعی میں توسیع

لاہور ہائیکورٹ نے افغان میڈیکل طلبہ کو میڈیکل کالجوں سے نکالنے کے اقدام کے خلاف دائر درخواستوں پر سماعت کرتے ہوئے پنجاب کے تمام میڈیکل کالجز کو افغان طلباء و طالبات کو نکالنے سے روکنے کے حکمِ امتناعی (Stay Order) میں توسیع کر دی ہے۔

جسٹس خالد اسحاق نے 30 سے زائد افغان میڈیکل طلبہ کی جانب سے دائر کی گئی درخواستوں پر سماعت کی۔ سماعت کے دوران پاکستان میڈیکل اینڈ ڈینٹل کونسل (PMDC) کے وکیل نے عدالت سے مزید وقت مانگتے ہوئے سماعت ملتوی کرنے کی استدعا کی، جسے عدالت عالیہ نے منظور کر لیا۔

درخواست گزاروں کی جانب سے موقف اختیار کیا گیا کہ انہوں نے افغان مہاجرین کے مقررہ کوٹے اور مکمل میرٹ کی بنیاد پر پنجاب کے مختلف میڈیکل کالجوں میں باقاعدہ داخلے حاصل کیے تھے۔ تاہم پی ایم ڈی سی نے یکم ستمبر کو ایک حتمی نوٹیفکیشن جاری کیا جس کا مقصد ان طلبہ کو کالجز سے خارج کرنا ہے۔ لاہور ہائیکورٹ نے حتمی فیصلے تک افغان طلبہ کے اخراج پر روک برقرار رکھتے ہوئے سماعت ملتوی کر دی۔