پاکستان اسٹاک ایکسچینج میں ہفتہ وار شدید اتار چڑھاؤ، 100 انڈیکس معمولی کمی سے بند

کراچی: پاکستان اسٹاک ایکسچینج میں گزشتہ کاروباری ہفتے شدید اتار چڑھاؤ دیکھنے میں آیا، تاہم 100 انڈیکس ہفتہ وار معمولی کمی کے ساتھ بند ہوا۔

کاروباری ہفتے کے اختتام پر کے ایس ای 100 انڈیکس 45 پوائنٹس کی کمی سے 184,130 پوائنٹس پر بند ہوا، جبکہ ہفتے کے دوران انڈیکس کی بلند ترین سطح 188,312 پوائنٹس اور کم ترین سطح 182,792 پوائنٹس ریکارڈ کی گئی۔اعداد و شمار کے مطابق مارکیٹ کا یومیہ اوسط تجارتی حجم ہفتہ وار بنیاد پر 17.6 فیصد اضافے سے ایک ارب 1 کروڑ 40 لاکھ شیئرز رہا۔اسی طرح یومیہ اوسط تجارتی مالیت میں بھی 11 فیصد اضافہ دیکھنے میں آیا جو بڑھ کر 17 کروڑ 58 لاکھ ڈالر تک پہنچ گئی۔دوسری جانب مارکیٹ کی مجموعی کیپیٹلائزیشن میں 55 ارب روپے کا اضافہ ہوا جس کے بعد یہ بڑھ کر 20 ہزار 883 ارب روپے ہو گئی۔ماہرین کے مطابق ہفتے کے دوران تیزی اور مندی کے رجحانات سرمایہ کاروں کے محتاط رویے کی عکاسی کرتے ہیں۔