پاکستان اور انڈونیشیا نے تجارتی تعلقات مضبوط کرنے پر اتفاق

پاکستان اور انڈونیشیا نے باہمی تجارتی تعلقات کو مزید مضبوط کرنے پر اتفاق کیا ہے۔ وفاقی وزیرِ تجارت جام کمال خان کی انڈونیشیا کے سفیر چندرا وارسننتو سوکوٹجو سے ملاقات ہوئی، جس میں دونوں ممالک نے سرکاری سطح پر تعاون کے فریم ورک کی بحالی پر زور دیا۔

ملاقات میں پاکستان کی چاول برآمدات کو ترجیحی ایجنڈا قرار دیا گیا اور قیمتوں میں مسابقت بڑھانے کے اقدامات جاری رکھنے پر اتفاق کیا گیا۔ 2015 کے پاکستان-انڈونیشیا رائس ایم او یو کو دوبارہ فعال کرنے کی کوششیں تیز کرنے پر بھی بات ہوئی، اور چاول کی ایک ملین میٹرک ٹن سالانہ فراہمی کے مسودہ ایم او یو کو جلد حتمی مرحلے میں لانے پر اتفاق ہوا۔

پاکستانی کینو کی برآمدات کے لیے کوٹہ اور ٹیسٹنگ کے مسائل پر تحفظات کا اظہار کیا گیا، کیونکہ زرعی مصنوعات کی اضافی جانچ لاگت اور وقت میں اضافہ کر سکتی ہے۔

پاکستان کی جانب سے انڈونیشی سرمایہ کاروں کو پام آئل، توانائی اور انفراسٹرکچر میں سرمایہ کاری کی دعوت دی گئی، جبکہ پاکستان کو علاقائی پام آئل اسٹوریج اور پروسیسنگ ہب بنانے کی تجویز بھی دی گئی۔ خصوصی اقتصادی زونز اور سی پیک منصوبوں میں تعاون کے امکانات زیرِ غور ہیں۔

دونوں ممالک نے جوائنٹ ٹریڈ اینڈ ڈویلپمنٹ کمیٹی کو جلد فعال کرنے اور تجارتی فورمز کے ذریعے تعاون بڑھانے پر اتفاق کیا۔