سندھ طاس معاہدہ: امریکی جریدے کی پاکستانی مؤقف کی بھرپور حمایت

اسلام آباد: سندھ طاس معاہدے کے خلاف بھارتی اقدامات پر معروف امریکی جریدے دی نیشنل انٹرسٹ نے پاکستانی مؤقف کی بھرپور حمایت کر دی ہے۔ جریدے کے مطابق بھارت کی جانب سے سندھ طاس معاہدے کی معطلی کے بعد جنوبی ایشیا میں پانی کی سیاست نے ایک نیا اور خطرناک رخ اختیار کر لیا ہے۔

رپورٹ میں کہا گیا ہے کہ سندھ طاس معاہدے کی معطلی سے خطے میں کشیدگی میں اضافہ ہوگا جبکہ بھارت کی جانب سے دُلہستی اسٹیج ٹو منصوبہ معاہدے کی کھلی خلاف ورزی ہے۔ دی نیشنل انٹرسٹ کے مطابق بھارت پانی کو اسٹریٹجک ہتھیار کے طور پر استعمال کرنے کی کوشش کر رہا ہے، جو جنوبی ایشیا میں ایک بڑے انسانی المیے کو جنم دے سکتا ہے۔

امریکی جریدے نے نشاندہی کی کہ بھارت کی جانب سے آبی ڈیٹا کی فراہمی روکنا بین الاقوامی قوانین کی سنگین خلاف ورزی ہے۔ رپورٹ میں یاد دلایا گیا کہ عالمی ثالثی عدالت واضح فیصلہ دے چکی ہے کہ بھارت سندھ طاس معاہدہ یکطرفہ طور پر معطل نہیں کر سکتا۔

دی نیشنل انٹرسٹ کے مطابق سندھ طاس معاہدہ جنوبی ایشیا میں فوڈ سیکیورٹی کی بنیادی ضمانت ہے اور بھارت قانونی طور پر مغربی دریاؤں کا پانی پاکستان کے لیے مہیا کرنے کا پابند ہے۔