پاکستان اور امریکا کا توانائی کے شعبے میں دوطرفہ تعاون بڑھانے پر اتفاق

پاکستان اور امریکہ نے توانائی سیکیورٹی اور دوطرفہ تعاون کو مزید فروغ دینے پر اتفاق کیا ہے۔ وفاقی وزیرِ پٹرولیم علی پرویز ملک سے امریکی ناظم الامور نیٹلی اے بیکر نے ملاقات کی، جس میں مشرقِ وسطیٰ کی موجودہ صورتحال کے پیشِ نظر پاکستان میں ایندھن کی بلاتعطل فراہمی کے اقدامات پر تبادلہ خیال کیا گیا۔ امریکی ناظم الامور نے ایندھن کی صورتحال کو بہتر انداز میں سنبھالنے کی تعریف کرتے ہوئے کہا کہ امریکہ طویل مدتی توانائی معاہدوں کے ذریعے پاکستان کی ضروریات پوری کرنے کا خواہاں ہے۔ اس موقع پر وزیرِ پٹرولیم نے امریکی کمپنیوں کو پاکستان منرلز انویسٹمنٹ فورم اور ملکی ریفائنریوں کی اپ گریڈیشن میں سرمایہ کاری کی دعوت دی، جبکہ پی ایس او اور پی ایل ایل کے حکام نے امریکی کمپنیوں کی ایل این جی سپلائی میں دلچسپی پر بریفنگ دی۔