پاکستان سمیت دیگر ممالک کے لیے امریکی امیگرنٹ ویزا سروس 21 جنوری سے معطل

پاکستان میں امریکی سفارت خانے نے بتایا ہے کہ امریکی محکمہ خارجہ 21 جنوری سے پاکستان سمیت دیگر ممالک کے درخواست دہندگان کے لیے امیگرنٹ ویزا سروس معطل کر رہا ہے۔

سفارت خانے کے مطابق یہ اقدام امریکی عوام کے تحفظ کو یقینی بنانے اور ویزا درخواست گزاروں کی مکمل جانچ پڑتال کے اعلیٰ معیار کو نافذ کرنے کے لیے کیا گیا ہے۔ امریکی وزیر خارجہ مارکو روبیو نے اس فیصلے کو نافذ کر دیا ہے۔

ویزا سروس تب تک معطل رہے گی جب تک یہ تصدیق نہ ہو جائے کہ نئے امیگرنٹ ویزا درخواست گزار مکمل چھان بین سے گزرے اور اپنی اہلیت ثابت کر چکے ہیں۔ اس کے ساتھ یہ بھی یقینی بنایا جائے گا کہ درخواست دہندگان امریکی سرکاری مالی معاونت پر انحصار نہ کریں۔

امریکی سفارت خانے نے واضح کیا کہ یہ معطلی صرف امیگرنٹ ویزا کے لیے ہے اور نان امیگرنٹ ویزا درخواستوں پر اثر نہیں پڑے گا۔ سیاح، طلبہ، کھلاڑی، ہنر مند افراد اور ان کے اہل خانہ کے ویزے جاری رہیں گے۔