وفاقی کابینہ نے 27ویں آئینی ترمیم کے مسودے کی منظوری دے دی

اسلام آباد: وزیراعظم شہباز شریف نے آذربائیجان کے دارالحکومت باکو سے ویڈیو لنک کے ذریعے وفاقی کابینہ اجلاس کی صدارت کی، جس میں 27ویں آئینی ترمیم کے مسودے کی منظوری دے دی گئی۔ کابینہ نے ترمیم کے مسودے کا بھرپور خیرمقدم کیا۔

وزیراعظم نے اجلاس کے آغاز پر کابینہ اراکین اور اتحادی جماعتوں کا شکریہ ادا کرتے ہوئے کہا کہ یہ ترمیم وفاق اور صوبوں کے درمیان رشتے کی مضبوطی اور ملک کے وسیع تر مفاد میں کی جا رہی ہے۔ انہوں نے کہا کہ وزارتِ قانون و انصاف، اٹارنی جنرل اور ان کی ٹیم نے اس مسودے کی تیاری میں نمایاں کردار ادا کیا جو لائقِ تحسین ہے۔

کابینہ کی منظوری کے بعد وزیراعظم کی ہدایت پر وزیرِ قانون و انصاف اعظم نذیر تارڑ نے میڈیا کو ترمیم کے خدوخال پر بریفنگ دی۔ منظوری کے بعد مسودہ پارلیمان میں پیش کیا جائے گا۔

وزیراعظم شہباز شریف نے کہا کہ انہوں نے اپنے قائد نواز شریف کو 27ویں آئینی ترمیم پر اعتماد میں لیا اور ان کی رہنمائی حاصل کی، جس پر وہ ان کے شکر گزار ہیں۔ انہوں نے مزید کہا کہ صدرِ مملکت آصف علی زرداری کو بھی ترمیم کے حوالے سے اعتماد میں لیا گیا اور ان کی رضامندی پر ان کا شکریہ ادا کیا۔

وزیراعظم نے تمام اتحادی جماعتوں کے سربراہان کا خصوصی طور پر ذکر کرتے ہوئے کہا کہ بلاول بھٹو زرداری، ڈاکٹر خالد مقبول صدیقی، عبدالعلیم خان، خالد حسین مگسی اور چوہدری سالک حسین سے بذاتِ خود ملاقات کرکے مشاورت کی گئی، اور سب نے اس ترمیم کی بھرپور تائید کی۔
انہوں نے بتایا کہ ایمل ولی خان، اعجاز الحق اور دیگر سیاسی رہنماؤں کو بھی مشاورت کے عمل میں شامل کیا گیا۔

وزیراعظم نے کہا کہ “اللہ کے فضل و کرم سے ملک میں سیاسی و معاشی استحکام کی بدولت ملک کی سمت درست ہوئی ہے، اب وقت ہے کہ ہم سب مل کر ملک کی ترقی و خوشحالی کے لیے کام کریں۔”