اسلام آباد کو خودمختار یونٹ بنانے پر نیا ٹیکس لگانے کی تجاویز تیار

اسلام آباد: وفاقی دارالحکومت اسلام آباد کو خودمختار یونٹ بنانے کی صورت میں اس کی انتظامی حدود میں بنیادی سہولیات اور انفراسٹرکچر کی دیکھ بھال کے لیے نیا مقامی ٹیکس لگانے کی تجاویز تیار کر لی گئی ہیں۔ باوثوق ذرائع کے مطابق اکٹھا ہونے والا ریونیو اسلام آباد کے ہسپتالوں، سکولوں، کالجوں اور فلاحی کاموں پر ہی خرچ کیا جائے گا۔

ابتدائی لائحہ عمل کے مطابق ایف بی آر کی جانب سے تیار کردہ ٹیکس تجاویز کو قائم ذیلی کمیٹی کی منظوری کے بعد وزیر منصوبہ بندی کی زیرِ صدارت کمیٹی اور بعد ازاں وزیراعظم شہباز شریف کو پیش کیا جائے گا۔ حتمی منظوری کے بعد ان تجاویز کو آئی ایم ایف کے ساتھ رواں ماہ شروع ہونے والے ‘ایکسٹینڈڈ فنڈ فسیلیٹی’ (EFF) کے پانچویں اقتصادی جائزے کے دوران زیرِ بحث لایا جائے گا، جبکہ نئے ٹیکس کو آئندہ مالی سال کے بجٹ میں شامل کیے جانے کا امکان ہے۔

دوسری جانب وزارتِ خزانہ نے تمام متعلقہ وزارتوں کو آئی ایم ایف وفد کے ساتھ طے شدہ سٹرکچرل بینچ مارکس، سرکلر ڈیٹ اور توانائی شعبے کی اصلاحات پر بریفنگ تیار کرنے کی ہدایت کر دی ہے۔ پاکستان اور آئی ایم ایف کے درمیان جائزہ مذاکرات کی کامیابی کی صورت میں ایک ارب ڈالر کی پانچویں قسط اور موسمیاتی تبدیلیوں سے نمٹنے کے لیے مزید 20 کروڑ ڈالر سمیت مجموعی طور پر 1.2 ارب ڈالر کی رقم ملنے کا قوی امکان ہے۔