27 ویں آئینی ترمیم کوئی طوفان نہیں، ابھی مشاورت کا آغاز ہوا ہے: رانا ثنااللہ

وزیراعظم کے مشیر برائے سیاسی و انتظامی امور رانا ثنااللہ نے کہا ہے کہ 27ویں آئینی ترمیم کو بلاوجہ خوفناک بنا کر پیش کیا جا رہا ہے، حالانکہ ابھی صرف مشاورت کا آغاز ہوا ہے۔
انہوں نے واضح کیا کہ اتفاقِ رائے کے بغیر کوئی ترمیم نہیں کی جائے گی۔ رانا ثنا نے کہا کہ بلاول بھٹو کی جانب سے جن نکات کا ذکر کیا گیا، ان میں سے کوئی بھی ایسی چیز نہیں جو زیرِ بحث نہ ہو۔
ان کا کہنا تھا کہ ن لیگ کو 18ویں آئینی ترمیم سے کوئی مسئلہ نہیں، تاہم صوبوں اور وفاق کے درمیان وسائل کے توازن کی ضرورت ہے۔ انہوں نے کہا کہ دفاعی اخراجات اور قرضوں کی ادائیگی کے بعد وفاق کے پاس کچھ نہیں بچتا، اس لیے وسائل کی منصفانہ تقسیم ناگزیر ہے۔
رانا ثنااللہ نے کہا کہ اتحادی جماعتوں سے بات چیت کے بعد تمام نکات عوام کے سامنے لائے جائیں گے۔ ان کے مطابق آئین میں ترامیم کا مقصد ہمیشہ بہتری اور نظام کی مضبوطی ہوتا ہے، نہ کہ کسی کے اختیارات کو کم یا زیادہ کرنا۔