سعودی عرب نے یمن میں ٹھکانوں پر 32 سے زائد فضائی حملے کئے: حوثیوں کا دعویٰ

صنعاء/ریاض: ایران کے حمایت یافتہ یمنی حوثی الملیشیا نے دعویٰ کیا ہے کہ سعودی جنگی طیاروں نے گزشتہ چند گھنٹوں کے دوران یمن کے مختلف اضلاع میں ان کے ٹھکانوں اور ملٹری پوزیشنز پر 32 سے زائد فضائی حملے کیے ہیں۔

حوثیوں کے زیرِ انتظام نشریاتی ادارے ‘المسیرہ ٹی وی’ کے مطابق سعودی طیاروں نے مأرب، الجوف، تعز اور الحدیدہ کے علاقوں میں متعدد کارروائیاں کیں۔ یہ رپورٹ ایک ایسے وقت میں سامنے آئی ہے جب ایک روز قبل حوثیوں نے سعودی عرب کے جنوبی اضلاع ابہا، خمیس مشیط، نجران اور جازان میں تیل کی تنصیبات، ائیرپورٹ اور ملٹری بیسز پر ڈرون اور بیلسٹک میزائل حملے کیے تھے، جن کے نتیجے میں 73 افراد زخمی ہوئے تھے اور کچھ توانائی تنصیبات میں سیکیورٹی وجوہات کی بنا پر کام عارضی طور پر معطل کرنا پڑا تھا۔

سعودی عرب کی جانب سے تازہ فضائی کارروائیوں کے دعوے پر فی الحال کوئی باضابطہ تبصرہ سامنے نہیں آیا، تاہم سعودی حکام نے قبل ازیں حوثی حملوں کا سخت فوجی جواب دینے کے عزم کا اظہار کیا تھا۔ خطے میں جاری اس نئی تصادم کی لہر سے بحیرہ احمر اور خلیجی خطے میں تحفظِ آمد و رفت اور توانائی کی بین الاقوامی منڈی پر شدید منفی اثرات مرتب ہونے کا خدشہ ظاہر کیا جا رہا ہے۔