کرک میں پولیس موبائل پر حملہ، ایک اہلکار جاں بحق، ایک زخمی

کرک: خیبر پختونخوا کے ضلع کرک میں تھانہ صابر آباد کی حدود میں نامعلوم مسلح افراد نے معمول کی گشت پر مامور پولیس موبائل پر اندھا دھند فائرنگ کر دی، جس کے نتیجے میں ایک پولیس کانسٹیبل شہید جبکہ دوسرا زخمی ہو گیا۔

پولیس حکام کے مطابق گزشتہ شب شنکئی ڈیم کے قریب معمول کے گشت پر موجود پولیس موبائل کو اچانک ہدف بنایا گیا۔ فائرنگ کے نتیجے میں کانسٹیبل ظفران موقع پر ہی جامِ شہادت نوش کر گئے جبکہ کانسٹیبل محمد امتیاز شدید زخمی ہوئے۔ واقعے کے فوراً بعد زخمی اہلکار کو ابتدائی طبی امداد کے لیے نزدیکی ہسپتال منتقل کر دیا گیا جہاں ان کا علاج جاری ہے۔

واقعے کے فوراً بعد پولیس کی اضافی نفری نے علاقے کو گھیرے میں لے کر ملزمان کی گرفتاری کے لیے وسیع پیمانے پر سرچ اینڈ سٹرائیک آپریشن شروع کر دیا ہے۔ پولیس حکام کا کہنا ہے کہ مختلف اہم شاہراہوں اور داخلی راستوں پر اضافی نکے قائم کر دیے گئے ہیں اور مشتبہ افراد کی نقل و حرکت پر کڑی نظر رکھی جا رہی ہے۔ حکام نے عزم کا اظہار کیا ہے کہ قانون نافذ کرنے والے اداروں پر حملے میں ملوث عناصر کو جلد قانون کے کٹہرے میں لایا جائے گا۔