اسحاق ڈار کا مصری وزیر خارجہ سے رابطہ، علاقائی صورتحال پر تبادلہ خیال

اسلام آباد: نائب وزیراعظم اور وزیر خارجہ سینیٹر محمد اسحاق ڈار اور مصر کے وزیر خارجہ ڈاکٹر بدر عبدالعاطی کے درمیان ٹیلی فونک رابطہ ہوا ہے، جس میں دونوں برادر ممالک کے دوطرفہ تعلقات کو مزید مستحکم بنانے اور مشرقِ وسطیٰ کی علاقائی صورتحال پر تفصیلی تبادلہ خیال کیا گیا۔

ترجمان دفتر خارجہ کے مطابق گفتگو کے دوران دونوں وزرائے خارجہ نے پاکستان اور مصر کے مابین تاریخی و قریبی روابط کا اعادہ کیا اور علاقائی امن و استحکام کے لیے قریبی و مسلسل مشاورت جاری رکھنے پر اتفاق کیا۔ دونوں رہنماؤں نے پاکستان، مصر، سعودی عرب اور ترکیہ پر مشتمل علاقائی فور (R4) کے وزرائے خارجہ کے پلیٹ فارم سمیت دیگر سفارتی ذرائع سے مشترکہ تحفظات اور مفادات پر روابط برقرار رکھنے کا عزم ظاہر کیا۔

اسحاق ڈار اور ان کے مصری ہم منصب ڈاکٹر بدر عبدالعاطی نے اقوام متحدہ کی جنرل اسمبلی (UNGA) کے آئندہ اجلاس کے موقع پر نیویارک میں بالمشافہ ملاقات پر بھی اتفاق کیا۔ دفتر خارجہ کے مطابق یہ رابطہ دونوں برادر ممالک کے درمیان سفارتی اور تزویراتی تعلقات کو نئی بلندیوں تک لے جانے کی کاوشوں کا حصہ ہے۔