روس کے شہر نووروسیسک پر یوکرینی ڈرون حملہ، بچے سمیت 4 افراد ہلاک

روس کے جنوبی خطے کراسنودار کے ساحلی شہر نووروسیسک پر یوکرین کے بڑے پیمانے پر کیے گئے ڈرون حملے کے نتیجے میں ایک بچے سمیت چار افراد ہلاک جبکہ 29 زخمی ہو گئے۔ علاقائی حکام کے مطابق گزشتہ رات روسی دفاعی نظام نے متعدد ڈرونز کو فضا میں ہی تباہ کر دیا، تاہم حملے کا اہم ترین ہدف نووروسیسک شہر تھا جہاں رہائشی آبادی کو شدید نقصان پہنچا۔

کراسنودار کے گورنر وینیامین کوندراتیف نے اپنے آفیشل ٹیلی گرام چینل پر واقعے کی تصدیق کرتے ہوئے بتایا کہ ڈرون حملے کے باعث چار افراد جان بحق ہوئے جن میں ایک معصوم بچہ بھی شامل ہے۔ گورنر کے مطابق حملے میں مزید 29 افراد زخمی ہوئے ہیں جنہیں فوری طور پر نزدیک ترین ہسپتالوں میں منتقل کر دیا گیا ہے، جبکہ زخمیوں میں سے تین افراد کی حالت تشویشناک بتائی جا رہی ہے۔

گورنر وینیامین کوندراتیف نے حملے میں ہلاک ہونے والے افراد کے لواحقین سے دلی تعزیت اور ہمدردی کا اظہار کرتے ہوئے کہا کہ انتظامیہ متاثرہ خاندانوں کے غم میں برابر کی شریک ہے۔ انہوں نے یقین دہانی کرائی کہ تمام زخمیوں کو بہترین طبی سہولیات فراہم کی جا رہی ہیں اور متاثرہ علاقوں میں امدادی کارروائیاں مکمل مستعدی کے ساتھ جاری ہیں۔