امریکا معاہدے کی شرائط کے ابتدائی مرحلے میں ہی پیچھے ہٹ رہا ہے: ایران

ایران کی وزارتِ خارجہ کے ترجمان اسماعیل بقائی نے امریکہ پر الزام عائد کیا ہے کہ وہ ایران کے ساتھ ہونے والے حالیہ معاہدے کی شرائط سے ابتدائی مرحلے میں ہی پیچھے ہٹ رہا ہے۔ سماجی رابطے کی ویب سائٹ پر ایک ویڈیو شیئر کرتے ہوئے ایرانی ترجمان نے امریکی صدارتی دفتر کی اس وضاحت پر سخت ردعمل دیا جس میں دعویٰ کیا گیا تھا کہ لبنان دو ہفتوں کی جنگ بندی کے معاہدے کا حصہ نہیں ہے۔ اسماعیل بقائی نے سوال اٹھایا کہ اگر یہ امریکہ کی جانب سے معاہدے سے پھرنے کی مثال نہیں ہے تو پھر اسے کیا نام دیا جائے۔

اسماعیل بقائی نے اپنے موقف کی تائید میں پاکستانی وزیراعظم شہباز شریف کا گزشتہ روز کا وہ بیان بھی شیئر کیا جس میں واضح طور پر کہا گیا تھا کہ ایران اور امریکہ کے درمیان ہونے والا فوری جنگ بندی کا اتفاق لبنان سمیت تمام متاثرہ علاقوں پر یکساں لاگو ہوگا۔ ایرانی وزارتِ خارجہ کے مطابق، امریکہ کا یہ دہرا معیار اور معاہدے کی من پسند تشریح خطے میں امن کی کوششوں کو سبوتاژ کر سکتی ہے۔ تہران کا کہنا ہے کہ جامع امن تب ہی ممکن ہے جب معاہدے کی تمام شقوں پر اس کی اصل روح کے مطابق عمل کیا جائے۔