چین کا حقیقی معنوں میں انسانی معاشرے کی ترقی اور خوشحالی کو فروغ دینے کا مطالبہ

چین نے واضح کیا ہے کہ مصنوعی ذہانت (AI) جیسی جدید تکنیکی ترقی کو حقیقی معنوں میں انسانی معاشرے کی فلاح، ترقی اور مشترکہ خوشحالی کے فروغ کے لیے استعمال ہونا چاہیے۔ عالمی میڈیا کی رپورٹ کے مطابق، چینی وزارتِ خارجہ کے ترجمان لین جیان نے اپنی یومیہ پریس بریفنگ کے دوران شنگھائی میں شروع ہونے والی “عالمی مصنوعی ذہانت کانفرنس 2026” اور “مصنوعی ذہانت کی عالمی حکمرانی پر اعلیٰ سطحی کانفرنس” کے انعقاد پر گفتگو کرتے ہوئے ان خیالات کا اظہار کیا۔

چینی ترجمان نے بتایا کہ اس عالمی کانفرنس کا آغاز 17 جولائی (آج) سے شنگھائی میں ہو رہا ہے۔ انہوں نے کہا کہ چین اس اہم ترین فورم سے فائدہ اٹھاتے ہوئے تمام عالمی فریقین کے ساتھ کھلے دل سے تبادلہ خیال کرنے اور وسیع تر اتفاقِ رائے پیدا کرنے کے لیے مکمل تیار ہے۔ چین کا مقصد یہ یقینی بنانا ہے کہ اس جدید ذہین دور (Intelligent Era) کے ثمرات اور فوائد دنیا بھر کے زیادہ سے زیادہ ترقی پذیر ممالک تک پہنچ سکیں۔

لین جیان نے اس بات پر خصوصی زور دیا کہ مصنوعی ذہانت کی ترقی پوری انسانیت کے مشترکہ مفادات اور مستقبل سے وابستہ ہے۔ انہوں نے واضح کیا کہ بیجنگ انتظامیہ آرٹیفیشل انٹیلی جنس کی تیز رفتار ترقی اور اس کی سلامتی کے درمیان بہترین توازن برقرار رکھنے کے اصول پر کاربند ہے۔ انہوں نے عالمی برادری میں ٹیکنالوجی کے نام پر کی جانے والی نظریاتی تقسیم اور یکطرفہ تکنیکی ناکہ بندیوں کی سخت مخالفت کی۔ ترجمان کا مزید کہنا تھا کہ چین عالمی سطح پر مصنوعی ذہانت کی جدت اور ترقی کے معیار کو بلند کرنے کے لیے اپنے تجربات، مہارت اور کامیابیاں دنیا بھر کے ساتھ شیئر کرنے کے لیے ہمیشہ تیار ہے۔