امریکا کا برازیل پر بعض درآمدات پر 25 فیصد ٹیرف عائد کرنے کا اعلان

امریکا نے برازیل سے درآمد کی جانے والی بعض اہم اشیا پر 25 فیصد اضافی ٹیرف (کسٹم ڈیوٹی) عائد کرنے کا اعلان کیا ہے۔ امریکی حکام کے مطابق یہ سخت اقدام برازیل کی جانب سے تجارتی قوانین کی مبینہ خلاف ورزیوں کے جواب میں اٹھایا گیا ہے۔ عالمی میڈیا کی رپورٹ کے مطابق، امریکی تجارتی نمائندے (USTR) جیمیسن گریر نے بدھ کے روز بتایا کہ یہ ٹیرف امریکی تجارتی قانون کے ‘سیکشن 301’ کے تحت نافذ العمل ہوگا۔

امریکی تجارتی نمائندے کے دفتر کے مطابق، یہ فیصلہ ایک سال تک جاری رہنے والی وسیع تحقیقات کے بعد کیا گیا ہے۔ اس تحقیقات میں برازیل کی ڈیجیٹل تجارت، ٹیکس محصولات، دانشورانہ املاک (Intellectual Property) کے تحفظ، ایتھنول تک رسائی اور جنگلات کی کٹائی سے متعلق ماحولیاتی پالیسیوں کا تفصیلی جائزہ لیا گیا۔ امریکی حکام کا مؤقف ہے کہ برازیل کی ان پالیسیوں سے امریکی تجارت اور معیشت براہ راست متاثر ہو رہی ہے۔ جیمیسن گریر نے واضح کیا کہ غیر منصفانہ تجارتی طریقوں سے نمٹنے اور امریکی ورکرز و کمپنیوں کو مارکیٹ میں مساوی مواقع فراہم کرنے کے لیے یہ قدم ناگزیر ہو چکا تھا، کیونکہ گزشتہ ایک سال سے برازیل کے ساتھ ہونے والے مذاکرات بے نتیجہ رہے، تاہم امریکا اب بھی مزید بات چیت کے لیے تیار ہے۔

دوسری جانب، امریکی وزیر خارجہ مارکو روبیو نے برازیل کی حکومت پر الزام عائد کیا ہے کہ اس نے واشنگٹن کے ساتھ مذاکرات میں کسی سنجیدگی کا مظاہرہ نہیں کیا۔ انہوں نے برازیل کے صدر لوئیز ایناسیو لولا ڈا سلوا کو کڑی تنقید کا نشانہ بناتے ہوئے کہا کہ برازیلی صدر نے دوطرفہ تجارتی معاہدے کے بجائے اپنی سیاسی ترجیحات کو فوقیت دی۔

میڈیا رپورٹس کے مطابق، برازیل امریکی صدر ڈونلڈ ٹرمپ کی نئی اور جارحانہ ٹیرف حکمت عملی کا نشانہ بننے والا پہلا ملک بن گیا ہے، جس کے تحت امریکی تجارتی قانون کے سیکشن 301 کا بھرپور استعمال کیا جا رہا ہے—یہ وہی شق ہے جو امریکی صدر کو مبینہ غیر منصفانہ تجارتی سرگرمیوں کے خلاف یکطرفہ کارروائی کا اختیار دیتی ہے۔