ذوالقرنین سکندر کے رجب بٹ پر سنگین الزامات، ثبوت بھی سامنے لے آئے

لاہور: پاکستان کے مشہور یوٹیوبر ذوالقرنین سکندر اور رجب بٹ کے درمیان جاری تنازع نے اس وقت ایک سنگین رخ اختیار کر لیا جب ذوالقرنین سکندر نے خاموشی توڑتے ہوئے رجب بٹ کے خلاف الزامات کی بوچھاڑ کر دی۔ اپنی اہلیہ کنول آفتاب کے ہمراہ فیملی ولاگز کے لیے مشہور ذوالقرنین سکندر کا کہنا تھا کہ وہ عموماً لڑائی جھگڑوں سے دور رہتے ہیں، لیکن رجب بٹ کی جانب سے کنول آفتاب پر کی جانے والی تنقید نے انہیں بولنے پر مجبور کر دیا ہے۔

ذوالقرنین سکندر نے رجب بٹ کے “سیلف میڈ” ہونے کے دعوے کو چیلنج کرتے ہوئے کہا کہ 2021 میں جب رجب غیر معروف تھے، انہوں نے خود ہم سے رابطہ کیا تھا۔ ذوالقرنین کا دعویٰ ہے کہ انہوں نے اور کنول آفتاب نے رجب بٹ کو اپنے پلیٹ فارمز پر متعارف کروایا، شاؤٹ آؤٹس دیئے اور ان کی ویورشپ بڑھانے میں کلیدی کردار ادا کیا۔ بات صرف یہیں تک محدود نہیں رہی، ذوالقرنین نے یہ انکشاف بھی کیا کہ رجب بٹ کی شادی کے اخراجات، لباس، میک اپ اور برانڈ کولیبوریشنز میں بھی انہوں نے بھرپور مالی و سماجی معاونت فراہم کی۔

اپنے مؤقف کو سچا ثابت کرنے کے لیے ذوالقرنین سکندر نے دعویٰ کیا ہے کہ ان کے پاس پیغامات، آڈیو کلپس اور سی سی ٹی وی فوٹیج جیسے ٹھوس ثبوت موجود ہیں۔ انہوں نے ایک وائس نوٹ بھی سنایا تاکہ یہ ثابت کر سکیں کہ رجب بٹ کو شہرت دلوانے میں ان کا کتنا ہاتھ تھا۔ اس تنازع نے سوشل میڈیا صارفین کو دو دھڑوں میں تقسیم کر دیا ہے اور امکان ظاہر کیا جا رہا ہے کہ آنے والے دنوں میں یہ معاملہ مزید شدت اختیار کر سکتا ہے۔