ایمان فاطمہ نے رجب بٹ کے خلاف قانونی قدم اٹھا لیا

مشہور یوٹیوبر رجب بٹ اور ان کی اہلیہ ایمان فاطمہ کے ازدواجی تنازع میں ایک نیا موڑ آ گیا ہے، جہاں ایمان فاطمہ نے فیملی کورٹ میں نان نفقے کا دعویٰ دائر کرتے ہوئے اپنے اور بیٹے کے لیے مالی معاونت کا مطالبہ کر دیا ہے۔ اس سے قبل رجب بٹ کی جانب سے طلاق کا نوٹس بھیجے جانے کی خبریں سامنے آئی تھیں، تاہم بعد ازاں ان کے بیٹے کی سالگرہ کی تقریب میں شرکت کے بعد صلح کی قیاس آرائیاں بھی شروع ہو گئی تھیں۔ ایمان فاطمہ کے وکلاء کا کہنا ہے کہ طلاق کا نوٹس متعلقہ یونین کونسل یا اتھارٹی میں باضابطہ طور پر رجسٹرڈ نہ ہونے کی وجہ سے یہ جوڑا تاحال قانونی طور پر میاں بیوی کی حیثیت میں ہے۔ اب معاملہ فیملی کورٹ میں پہنچنے کے بعد سوشل میڈیا صارفین کی توجہ ایک بار پھر اس جوڑے کی گھریلو زندگی اور اس قانونی چارہ جوئی پر مرکوز ہو گئی ہے۔