یوٹیوب نے اے آئی سے بنائے متعدد چینلز ڈیلیٹ کر دیے

2026 کے آغاز پر گوگل کی ملکیت یوٹیوب نے اے آئی سے بنائی گئی ناقص کوالٹی کی ویڈیوز (AI Slops) کے خلاف بڑی کارروائی کرتے ہوئے 4.7 ارب سے زائد ویوز ڈیلیٹ کر دیے ہیں۔

نومبر 2025 میں آن لائن ویڈیو ایڈیٹنگ پلیٹ فارم Kapwing کی جانب سے جاری کی گئی ابتدائی رپورٹ میں یوٹیوب کے سب سے زیادہ سبسکرائب کیے گئے 100 اے آئی سلوپ چینلز کی نشاندہی کی گئی تھی۔ تازہ رپورٹ کے مطابق ان میں سے 16 چینلز اب مکمل طور پر یوٹیوب سے ہٹا دیے گئے ہیں یا ان کا تمام مواد ڈیلیٹ کر دیا گیا ہے۔

ڈیلیٹ ہونے والے چینلز میں CuentosFacianantes (کم معیار کی ڈریگن بال تھیم ویڈیوز)، Imperio de Jesus (Empire of Jesus) اور Super Cat League شامل ہیں۔ یہ تمام چینلز مجموعی طور پر 3 کروڑ 50 لاکھ سے زائد سبسکرائبرز رکھتے تھے۔

ان چینلز کی ویڈیوز کو اب تک 4.7 ارب سے زائد بار دیکھا جا چکا تھا اور یہ چینلز سالانہ تقریباً ایک کروڑ ڈالر تک کمائی کر رہے تھے۔ اگرچہ فہرست میں شامل کچھ بڑے اے آئی چینلز اب بھی موجود ہیں، تاہم ان کا سارا مواد بھی یوٹیوب سے ہٹا دیا گیا ہے۔

ذرائع کے مطابق یوٹیوب یہ کارروائیاں اپنے جدید اسپیم ڈیٹیکشن سسٹمز کے تحت کر رہا ہے، جس کا مقصد اے آئی کے ذریعے تیار کیے گئے کم معیار اور گمراہ کن مواد کا خاتمہ کرنا ہے۔