یوٹیوب نے والدین کے لیے نئے کنٹرولز متعارف کرا دیے، بچوں کے اسکرین ٹائم کو منظم کرنے میں مدد

نوجوانوں میں یوٹیوب کے بڑھتے استعمال کو مدنظر رکھتے ہوئے یوٹیوب نے والدین کے لیے نئے فیچرز متعارف کرا دیے ہیں، جن کا مقصد بچوں اور نوجوانوں کے اسکرین ٹائم کو بہتر انداز میں منظم کرنا ہے۔

یوٹیوب کے مطابق والدین اب ’’شارٹس ٹائمر‘‘ کے ذریعے یہ طے کر سکیں گے کہ ان کے بچے مختصر ویڈیوز کتنی دیر دیکھ سکتے ہیں۔ والدین ضرورت کے مطابق ٹائمر صفر پر بھی سیٹ کر سکتے ہیں، جبکہ مستقبل میں مستقل طور پر شارٹس بند کرنے کا آپشن بھی فراہم کیا جائے گا۔

اس کے علاوہ سپروائزڈ اکاؤنٹس استعمال کرنے والے والدین اب بچوں کے لیے سونے کے اوقات اور وقفوں کی یاد دہانیاں بھی خود ترتیب دے سکیں گے، تاکہ صحت مند ڈیجیٹل عادات کو فروغ دیا جا سکے۔

یوٹیوب نے موبائل ایپ میں اکاؤنٹ سوئچنگ کو بھی آسان بنا دیا ہے، جس سے ایک ہی ڈیوائس استعمال کرنے والے خاندان کے مختلف افراد کے لیے الگ الگ پروفائلز بنانا ممکن ہو سکے گا۔