یوٹیوب موبائل ایپ میں متعدد نئی تبدیلیاں کر دی گئیں

عالمی ویڈیو شیئرنگ پلیٹ فارم یوٹیوب (YouTube) نے اینڈرائیڈ اور آئی او ایس (iOS) صارفین کے لیے متعدد نئی اور اہم تبدیلیوں کا اعلان کیا ہے، جن کا مقصد ہوم پیج کو استعمال کرنے کے تجربے کو زیادہ بہتر اور آسان بنانا ہے۔

ٹیکنالوجی ویب سائٹ ‘9 ٹو 5 گوگل’ کی رپورٹ کے مطابق، یوٹیوب اپنے ٹاپ بار کا نیا ڈیزائن پیش کر رہا ہے جس میں سبسکرپشنز (Subscriptions) کے ٹیب کو نیچے سے ہٹا کر ہوم بٹن کے ساتھ اوپر کی بار میں منتقل کیا جا رہا ہے۔ اس کے علاوہ ‘لائیو میوزک’ اور ‘موویز اینڈ ٹی وی’ کی نئی فیڈز بھی ٹاپ بار کا حصہ بنائی گئی ہیں۔

اس اپ ڈیٹ کی سب سے اہم خصوصیت پلس (+) بٹن کے ذریعے ‘کسٹم فیڈز’ (Custom Feeds) بنانے کا فیچر ہے۔ اس کے تحت صارفین اپنی پسند کے کسی بھی خاص موضوع کو منتخب کر کے ایک الگ فیڈ تیار کر سکیں گے، جس سے انہیں بار بار ویڈیوز سرچ کرنے کی ضرورت نہیں رہے گی۔ رپورٹ کے مطابق، مفت یوٹیوب استعمال کرنے والے 3 کسٹم فیڈز جبکہ ‘یوٹیوب پریمیم’ کے صارفین 8 فیڈز محفوظ کر سکیں گے۔ یہ فیچر فی الحال امریکہ میں متعارف کروایا جا رہا ہے جسے جلد دیگر ممالک تک توسیع دی جائے گی۔