گروک کے لئے نیا امیجِن ایمیج 2.0 ماڈل متعارف

ایلون مسک کی مصنوعی ذہانت سے متعلق کمپنی ’ایکس اے آئی‘ (xAI) نے اپنا نیا اور جدید اے آئی امیج جنریشن ماڈل ”امیجِن ایمیج 2.0“ (Imagine Image 2.0) متعارف کرا دیا ہے۔ یہ نیا ورژن گروک (Grok) کی ویب سروس سمیت آئی او ایس (iOS) اور اینڈرائیڈ ایپس پر ایک خاص ”کوالٹی موڈ“ (Quality Mode) کے طور پر فراہم کر دیا گیا ہے۔ نیا ماڈل خاص طور پر ایسے تخلیقی اور پیشہ ورانہ کاموں کے لیے تیار کیا گیا ہے جن میں تصاویر کے درست لے آؤٹ، واضح تحریر اور بار بار استعمال ہونے والے بصری عناصر کو ایک جیسا برقرار رکھنا انتہائی ضروری ہوتا ہے۔

کمپنی کا کہنا ہے کہ ایمیج 2.0 صارف کی جانب سے دی گئی پیچیدہ اور تفصیلی ہدایات (Prompts) پر باریک بینی سے عمل کرتا ہے۔ یہ پیچیدہ ڈیزائنز میں ٹائپوگرافی، لے آؤٹ کی ترتیب اور تصویر میں موجود چھوٹے سے چھوٹے متن کو مکمل طور پر واضح رکھنے کی صلاحیت رکھتا ہے۔ علاوہ ازیں، اس میں جدید ایڈیٹنگ ٹولز جیسے میجک وینڈ اور سیگمنٹیشن شامل ہیں، جن کی مدد سے صارف تصویر کے مخصوص حصے کو منتخب کر کے اس میں تبدیلی کر سکتا ہے جبکہ باقی حصہ جوں کا توں رہتا ہے۔

اس ماڈل میں ایک ساتھ پانچ ریفرنس تصاویر کو ملانے کی سہولت بھی دی گئی ہے، جس سے مختلف عناصر کو ملا کر پیچیدہ مناظر بنانا اور بھی آسان ہو گیا ہے۔ اس کے علاوہ، پس منظر (Background) کو ہٹا کر شفاف فارمیٹ میں محفوظ کرنے اور سمارٹ ری سائز کے ذریعے 1:2، 9:16، لینڈ سکیپ اور 2:1 جیسے مختلف تناسب (Aspect Ratios) میں تصویر کو ڈھالنے کی خصوصیات بھی اس کا حصہ ہیں۔ واضح رہے کہ فی الوقت اس ماڈل کی اے پی آئی (API) رسائی فراہم نہیں کی گئی، جسے مستقبل میں جاری کیا جائے گا