ایکس (ٹوئٹر) میں آٹومیٹک ٹرانسلیشن فیچر متعارف

سوشل میڈیا پلیٹ فارم ایکس (ٹوئٹر) نے صارفین کے تجربے کو مزید بہتر بنانے کے لیے دو بڑے فیچرز متعارف کرانے کا اعلان کیا ہے، جن میں پوسٹس کا خودکار ترجمہ (Automatic Translation) اور ایک جدید اے آئی فوٹو ایڈیٹر شامل ہیں۔ ایکس کے پراڈکٹ ہیڈ نکیتا بیئر (Nikita Bier) کے مطابق، یہ دونوں فیچرز کمپنی کے طاقتور اے آئی ماڈل ‘گروک’ (Grok) پر مبنی ہیں۔ خودکار ترجمے کا فیچر دنیا بھر میں پیش کیا جا رہا ہے، جس کی مدد سے صارفین گیئر آئیکون پر جا کر اپنی پسندیدہ زبان میں پوسٹس کا ترجمہ دیکھ سکیں گے، جس سے عالمی مواد تک رسائی آسان ہو جائے گی۔

دوسری جانب، ایکس کی آئی او ایس (iOS) ایپ کے لیے ایک جدید امیج ایڈیٹر بھی متعارف کرایا گیا ہے، جو جلد اینڈرائیڈ صارفین کو بھی دستیاب ہوگا۔ اس فیچر کے تحت صارفین نہ صرف تصاویر پر ڈرائنگ اور ٹیکسٹ ٹولز استعمال کر سکیں گے بلکہ حساس تفصیلات کو دھندلا (Blur) بھی کر سکیں گے۔ اس ایڈیٹر کی خاص بات گروک اے آئی کا انضمام ہے، جو صارفین سے پوچھے گا کہ وہ تصویر کو کس طرح ایڈٹ کرنا چاہتے ہیں اور ان کی ہدایات کے مطابق تبدیلی کرے گا۔ ماہرین کے مطابق، ان نئے اضافوں سے ایکس دیگر سوشل میڈیا پلیٹ فارمز کے مقابلے میں اپنی پوزیشن مزید مستحکم کرنے میں کامیاب ہو جائے گا۔