ایکس پر کانٹینٹ کریئیٹرز کے لیے پرانا نظام آج ختم، کل سے نیا متعارف

کیلیفورنیا: سوشل میڈیا پلیٹ فارم ایکس (سابقہ ٹویٹر) نے دنیا بھر کے کانٹینٹ کریئیٹرز کے لیے آمدنی کا ایک نیا اور شفٹڈ نظام متعارف کرانے کا اعلان کیا ہے، جس کا مقصد چوری شدہ، کاپی پیسٹ اور غیر معیاری مواد کا خاتمہ کر کے صرف اوریجنل مواد تخلیق کرنے والوں کو مالی فوائد فراہم کرنا ہے۔

کمپنی کی جانب سے کریئیٹرز کو بھیجے گئے باقاعدہ نوٹیفکیشن کے مطابق اس نئے نظام کو ’اوریجنل کانٹینٹ ریوارڈز پروگرام‘ (Original Content Rewards Program) کا نام دیا گیا ہے۔ ایکس کے اعلان کے مطابق 7 ستمبر 2026ء کو موجودہ ایڈز ریوینیو شیئرنگ پروگرام کو مکمل طور پر ختم کر دیا جائے گا، جبکہ 8 ستمبر 2026ء سے نئے اوریجنل کانٹینٹ ریوارڈز پروگرام کے لیے درخواستوں کی وصولی کا باقاعدہ آغاز ہوگا۔ جن کریئیٹرز کی شناختی تصدیق اور ادائیگی کا ذریعہ پہلے سے منسلک ہے، وہ اپنے کریئیٹر اسٹوڈیو کے ذریعے اپنی اہلیت چیک کر سکیں گے۔

پاکستان سمیت متعدد ممالک میں ایکس مونیٹائزیشن کے آغاز کے بعد سے دیگر پلیٹ فارمز (ٹک ٹاک، فیس بک، انسٹاگرام) اور ٹی وی چینلز کی لائیو نشریات سے ویڈیو کلپس کاٹ کر پوسٹ کرنے کا رجحان تیزی سے بڑھ گیا تھا، جس سے پلیٹ فارم پر کاپی شدہ مواد کی بھر مار ہو گئی تھی۔ ایکس انتظامیہ کا کہنا ہے کہ نیا نظام الگورتھم کی مدد سے اوریجنل اور خود تیار کردہ مواد کو ترجیح دے گا تاکہ حقیقی محنت کرنے والے کریئیٹرز کو ان کا حق مل سکے۔