ورلڈ کلچر فیسٹیول: امریکی موسیقاروں کی میوزک اور پولش آرٹسٹ کی فائن آرٹس ورکشاپ

آرٹس کونسل آف پاکستان کراچی کے زیرِ اہتمام عالمی ثقافت کا شاہکار ‘تیسرا ورلڈ کلچر فیسٹیول 2026’ پوری آب و تاب اور جوش و خروش کے ساتھ جاری ہے۔

فیسٹیول کے نویں روز فنونِ لطیفہ سے دلچسپی رکھنے والوں کے لیے امریکی اور یورپی فنکاروں کی جانب سے خصوصی ورکشاپس کا اہتمام کیا گیا۔ امریکا کے معروف موسیقار رضوان جگانی اور پیانسٹ سولٹو نے میوزک ورکشاپ کا انعقاد کیا، جس میں موسیقی کے طلبہ اور فنکاروں نے بڑی تعداد میں شرکت کی۔ امریکی فنکاروں نے چیمبر میوزک میں ہم آہنگی، توازن اور سروں کی ترتیب کے حوالے سے عملی تربیت دی اور اپنے فن کا شاندار مظاہرہ کر کے حاضری سے داد وصول کی۔

اسی طرح فیسٹیول کے لابی ایریا میں منعقدہ فائن آرٹس ورکشاپ کے دوران پولینڈ کی نامور آرٹسٹ نے شرکاء کو مصوری اور فائن آرٹس کی جدید تکنیکیں سکھائیں۔ انہوں نے رنگوں اور کاغذ کے امتزاج کے ذریعے دنیا کو امن و سلامتی کا پیغام دینے کے گر بتائے۔ اس موقع پر صدر آرٹس کونسل کراچی محمد احمد شاہ نے گفتگو کرتے ہوئے کہا کہ فنونِ لطیفہ انسانی قلوب کو جوڑنے اور عالمی سطح پر امن کا پیغام پھیلانے کا سب سے مؤثر ذریعہ ہیں، جن کے ذریعے ہم موسیقی، رنگوں اور تھیٹر کو بروئے کار لا کر ایک پرامن معاشرے کی بنیاد رکھ سکتے ہیں۔