اختلافات کے بجائے عوامی مشکلات حل کرنا ترجیح، وفاق سے ملکر چلنا چاہتے ہیں: بلاول بھٹو

چیئرمین پاکستان پیپلز پارٹی بلاول بھٹو زرداری نے کہا ہے کہ محض تنقید کرنا آسان جبکہ عملی طور پر عوامی کام کرنا مشکل ہوتا ہے، طاقت کا اصل اور حقیقی استعمال ایک محفوظ، منصفانہ اور پائیدار مستقبل کی تعمیر میں ہے۔

سندھ کے تاریخی شہر لاڑکانہ میں ایک پروقار تقریب سے خطاب کرتے ہوئے بلاول بھٹو زرداری نے کہا کہ موجودہ دور میں جہاں دنیا بھر کو معاشی بحران کا سامنا ہے، وہاں پاکستان کے عوام بھی اس سے براہِ راست متاثر ہو رہے ہیں۔ انہوں نے صحت اور تعلیم کو اپنی حکومت کی اولین ترجیح قرار دیتے ہوئے اعلان کیا کہ لاڑکانہ میں 600 بستروں پر مشتمل عالمی معیار کا جدید ترین ہسپتال قائم کیا جا رہا ہے تاکہ بلوچستان سمیت پورے خطے کے پسماندہ طبقے کو مفت اور معیاری علاج میسر آ سکے۔ ان کا کہنا تھا کہ پنجاب، خیبر پختونخوا اور بلوچستان کے مقابلے میں سندھ حکومت اعلیٰ تعلیم اور صحت کے شعبے پر سب سے زیادہ وسائل صرف کر رہی ہے۔

سیاسی و معاشی صورتحال پر گفتگو کرتے ہوئے انہوں نے بتایا کہ وزیراعظم شہباز شریف کے ساتھ ان کی حالیہ ملاقات انتہائی مثبت رہی، جس میں وفاق اور صوبوں کے درمیان کوآرڈینیشن بہتر بنانے کے لیے کراچی میں اجلاس اور مختلف صوبوں میں وفاقی کابینہ کے اجلاس بلانے پر اتفاق ہوا ہے۔ انہوں نے وفاقی حکومت کو مشورہ دیا کہ معاشی بحران کی موجودگی میں سیاسی محاذ آرائی سے گریز کرتے ہوئے تمام سیاسی اسٹیک ہولڈرز کے ساتھ بات چیت شروع کی جائے کیونکہ پی ٹی آئی یا مولانا فضل الرحمان سے لڑائی عوام کی مشکلات میں اضافے کا سبب بنے گی۔ عالمی صورتحال اور امریکی انتخابات پر تبصرہ کرتے ہوئے بلاول بھٹو نے کہا کہ امریکی عوام نے ڈونلڈ ٹرمپ کو امن کے نعرے پر ووٹ دیا ہے، تاہم اسرائیل نے سازش کے تحت امریکا کے ساتھ مل کر ایران پر حملہ کیا اور جنگ مسلط کی، جس کے ہولناک معاشی اثرات پوری دنیا بھگت رہی ہے۔