اپر کُرم میں افغانستان سے دراندازی کی کوشش ناکام، مسلح افغان خارجی گرفتار

خیبر پختونخوا کے سرحدی ضلع اپر کُرم میں سیکیورٹی فورسز نے افغانستان سے پاکستان کے اندر دراندازی کی ایک اور خطرناک کوشش کو ناکام بناتے ہوئے ایک مسلح افغان خارجی کو حراست میں لے لیا ہے۔

سیکیورٹی ذرائع کے مطابق، افغانستان کی سرحد کی جانب سے دہشت گردوں کا ایک گروپ غیر قانونی طور پر سرحد عبور کرنے کی کوشش کر رہا تھا۔ سیکیورٹی فورسز نے بروقت اور مؤثر کارروائی کرتے ہوئے ایک مسلح رکن کو گرفتار کر لیا جبکہ اس کے دیگر ساتھی واپس افغان علاقے کی طرف فرار ہو گئے۔ گرفتار ہونے والے افغان خارجی کی شناخت قاری وقاص عرف قدوس کے نام سے ہوئی ہے، جو افغانستان کے علاقے سپین غر کا رہائشی ہے۔ ابتدائی تفتیش میں ملزم نے اعتراف کیا ہے کہ وہ پاکستان میں متحرک خارجی کاظم گروپ میں شمولیت اور کارروائیاں کرنے کے لیے سرحد پار کر رہا تھا۔

گرفتار ملزم کے قبضے سے 1 سب مشین گن (SMG)، 4 میگزین اور 88 گولیاں برآمد کی گئی ہیں۔ اس کے علاوہ اس سے ایک نوٹس نوٹ بک بھی ملی ہے، جس میں مختلف حساس مقامات کی نشان دہی اور بم بنانے کی جدید تکنیکوں سے متعلق تفصیلات درج ہیں۔ سیکیورٹی ذرائع کا کہنا ہے کہ گرفتار افغان خارجی قاری وقاص سے مزید اعلیٰ سطحی تفتیش کا سلسلہ جاری ہے تاکہ اس کے نیٹ ورک اور سرحد کی دونوں جانب موجود سہولت کاروں کا سراغ لگایا جا سکے۔