کم عمر بچیوں کو آن لائن بلیک میل کرنے والے 2 ملزم گرفتار

نیشنل کاؤنٹر سائبر کرائم انویسٹی گیشن ایجنسی (NCCIA) گوجرانوالہ نے ایک بڑی کامیابی حاصل کرتے ہوئے کم عمر بچیوں کو آن لائن بلیک میل کرنے والے 2 ملزمان کو سیالکوٹ سے گرفتار کر لیا ہے، جبکہ ان کے قبضے سے 3 موبائل فونز برآمد کر لیے گئے ہیں۔

ترجمان این سی سی آئی اے کے مطابق، گرفتار ملزمان کی شناخت صہیب حسن اور اقبال خورشید کے نام سے ہوئی ہے، جنہیں ضلع سیالکوٹ کے علاقے ملکی کلاں سے ایک گھیراؤ کے دوران گرفتار کیا گیا۔ ترجمان نے بتایا کہ ملزمان سوشل میڈیا پلیٹ فارم فیس بک پر جعلی پروفائلز بنا کر کم عمر بچیوں سے دوستی اور رابطہ قائم کرتے تھے، اور پھر ویڈیو کالز کے دوران ان کی نازیبا تصاویر و ویڈیوز حاصل کر کے انہیں آن لائن بلیک میلنگ کا نشانہ بناتے تھے۔

ایجنسی نے ملزمان کے خلاف سائبر کرائم قوانین کے تحت مقدمہ درج کر کے باقاعدہ تفتیش شروع کر دی ہے۔ ڈی جی این سی سی آئی اے سید علی ناصر رضوی نے اس کارروائی پر ردِعمل دیتے ہوئے کہا کہ ادارہ بچوں کے تحفظ اور آن لائن ہراسانی و بلیک میلنگ کے خاتمے کے لیے پرعزم ہے۔ انہوں نے شہریوں پر زور دیا کہ سائبر ہراسانی یا کسی بھی شکایت کی صورت میں فوری طور پر ہیلپ لائن 1799 پر رابطہ کریں یا اپنے قریبی سرکل میں رپورٹ درج کروائیں۔