پاکستان کو 10 سال میں 3 کروڑ نوکریاں پیدا کرنا ہوں گی: صدرعالمی بینک

عالمی بینک کے صدر اجے بنگا نے کہا ہے کہ پاکستان کو اگلے 10 سال میں تقریباً 3 کروڑ نوکریاں پیدا کرنا ہوں گی تاکہ بڑھتی ہوئی نوجوان آبادی کو روزگار مل سکے۔ انہوں نے کہا کہ ملک میں ہر سال 25 سے 30 لاکھ نئی ملازمتیں پیدا کرنا ضروری ہیں، بصورت دیگر بے روزگاری، سماجی بدامنی اور ہجرت میں اضافہ ہوگا۔

اجے بنگا نے بین الاقوامی میڈیا کو دیے گئے انٹرویو میں بتایا کہ عالمی بینک پاکستان کے ساتھ سالانہ 4 ارب ڈالر کی شراکت داری کرے گا۔ انہوں نے کہا کہ نوکریوں کا 90 فیصد حصہ نجی شعبہ پیدا کرتا ہے، جبکہ زراعت سے بھی تقریباً ایک تہائی روزگار حاصل کیا جا سکتا ہے۔

انہوں نے بجلی کے شعبے کو سب سے بڑا مسئلہ قرار دیتے ہوئے کہا کہ نظام میں اصلاحات کی فوری ضرورت ہے کیونکہ بجلی کے نقصانات معیشت اور سرمایہ کاری کو متاثر کر رہے ہیں۔

علاوہ ازیں اجے بنگا نے کہا کہ شمسی توانائی فائدہ مند ہے مگر اس کے نظام میں بہتری ضروری ہے، جبکہ صحت، انفراسٹرکچر، سیاحت اور زراعت میں زیادہ روزگار کے مواقع موجود ہیں۔ انہوں نے زور دیا کہ ماحولیاتی تحفظ کو ترقیاتی منصوبوں میں لازمی شامل کیا جانا چاہیے۔