سیارہ مرکری مزید سکڑتا جارہا ہے، مگر کیوں؟

ٹوکیو / واشنگٹن: شمسی نظام میں سورج کے سب سے قریب ترین سیارے ‘مرکری’ (عطارد) کے بارے میں سائنسدانوں نے انکشاف کیا ہے کہ یہ وقت کے ساتھ ساتھ بتدریج سکڑتا جا رہا ہے۔

مرکری کے مسلسل سکڑنے کی بنیادی وجہ اس کا اندرونی درجہ حرارت اور ساخت ہے۔ اپنے قیام کے ابتدائی دور میں مرکری کا اندرونی حصہ انتہائی گرم تھا، تاہم اربوں سال گزرنے کے ساتھ ساتھ اس کا لوہے (Iron) سے بھرپور مرکز (Core) مسلسل ٹھنڈا ہو رہا ہے۔ طبیعیات کے اصولوں کے مطابق جب اندرونی مادہ ٹھنڈا ہوتا ہے تو وہ سکڑتا ہے، جس کے باعث پورے سیارے کے حجم میں معمولی کمی واقع ہو رہی ہے۔

اس اندرونی سکڑاؤ کا براہِ راست اثر سیارے کی اوپری سطح پر پڑتا ہے۔ شدید دباؤ کے باعث مرکری کی سطح پر اونچی چٹانیں، لمبی دراڑیں اور شکن نما تہیں تشکیل پا رہی ہیں۔ سائنسی اندازوں کے مطابق اپنی ابتدائی حالت کے مقابلے میں مرکری کا قطر کئی کلومیٹر کم ہو چکا ہے۔ اگرچہ یہ عمل انتہائی سست رفتار ہے اور انسانی پیمانے پر محسوس نہیں ہوتا، مگر یہ سکڑاؤ آج بھی جاری ہے۔

علمِ فلکیات کے ماہرین کے مطابق یہ پیش رفت اس بات کی دلیل ہے کہ مرکری محض ایک “مردہ یا ٹھنڈی چٹان” نہیں ہے، بلکہ اس کا اندرونی حصہ اب بھی حرارتی اور ارضیاتی طور پر ارتقا کے عمل سے گزر رہا ہے۔ اندرونی حرارت کے تدریجی اخراج کی وجہ سے ہی آج بھی اس کی سطح پر نئی ارضیاتی تبدیلیوں کے واضح شواہد دیکھنے کو ملتے ہیں۔