ایپل اپنا فولڈ ایبل آئی فون کب متعارف کرائے گا؟

ٹیکنالوجی کی دنیا کی معروف کمپنی ایپل نے باضابطہ طور پر فولڈ ایبل اسمارٹ فون کے شعبے میں قدم رکھنے کی تیاری کر لی ہے۔

برسوں تک سام سنگ اور دیگر حریف کمپنیوں کو فولڈ ایبل اسکرین پر پڑنے والی شکنوں اور ناقابلِ اعتماد ہِنج جیسے مسائل کا سامنا کرتے دیکھنے کے بعد اب ایپل کو یقین ہے کہ وہ ان تکنیکی رکاوٹوں کا مؤثر حل تلاش کر چکا ہے۔ اسی اعتماد کے ساتھ کمپنی فولڈ ایبل آئی فون متعارف کرانے جا رہی ہے۔

ایپل کے معتبر تجزیہ کار منگ چی کو کے مطابق فولڈ ایبل آئی فون کی لانچنگ 2026 کے اختتام پر متوقع ہے۔

ٹیکنالوجی ویب سائٹ میک رومرز کا کہنا ہے کہ یہ ڈیوائس محض ایک عام فولڈ ایبل فون نہیں ہوگی بلکہ یہ ایپل کی اب تک کی سب سے جرات مندانہ اور انقلابی ایجاد ثابت ہو سکتی ہے، جو اسمارٹ فون انڈسٹری کا رخ بدلنے کی صلاحیت رکھتی ہے۔