واٹس ایپ نے صارفین کو ممکنہ فراڈ سے بچانے کیلئے نیا فیچر متعارف کرادیا

کیلیفورنیا: دنیا کی مقبول ترین میسجنگ ایپ واٹس ایپ نے اپنے صارفین کو آن لائن فراڈ اور اسکامز سے محفوظ رکھنے کے لیے ایک نیا ‘اسکام الرٹ’ (Scam Alert) فیچر متعارف کرانے پر کام شروع کر دیا ہے، جس کی آزمائش فی الحال اینڈرائیڈ کے تازہ ترین بیٹا (Beta) ورژن پر کی جا رہی ہے۔

ٹیکنالوجی ویب سائٹ WABetaInfo کی رپورٹ کے مطابق اس فیچر کا بنیادی مقصد نامعلوم نمبرز اور کانٹیکٹس سے موصول ہونے والے مشکوک و غیر مصدقہ پیغامات کے بارے میں صارفین کو بروقت آگاہ کرنا ہے۔ کسی بھی خطرے کی نشاندہی پر الرٹ براہِ راست چیٹ ونڈو کے اندر نمایاں ہوگا، جس کے بعد صارف خود یہ فیصلہ کر سکے گا کہ پیغام بھیجنے والے کو بلاک اور رپورٹ کرنا ہے یا اس پر اعتماد کرنا ہے۔ رپورٹ میں واضح کیا گیا ہے کہ یہ فیچر کسی اسکام کو خودکار طور پر بلاک نہیں کرے گا بلکہ ڈیوائس کے اندر موجود مشین لرننگ (Machine Learning) ماڈل کا استعمال کرتے ہوئے صارف کو اضافی معلومات فراہم کرے گا۔ میٹا کے مطابق تمام تر تجزیہ فون پر ہی ہوگا اور اینڈ ٹو اینڈ انکرپشن کی وجہ سے پیغامات کا مواد کمپنی سرورز پر منتقل نہیں ہوگا۔

یہ نیا اسکام الرٹ فیچر مکمل طور پر اختیاری (Optional) ہوگا اور بائی ڈیفالٹ ایکٹو نہیں ہوگا۔ اینڈرائیڈ صارفین اسے واٹس ایپ سیٹنگز کے ‘اکاؤنٹس’ (Accounts) آپشن میں جا کر خود فعال کر سکیں گے۔ فی الوقت یہ خصوصیت بیٹا ٹیسٹنگ کے مرحلے میں ہے، اس لیے تمام عام صارفین کے لیے اس کی باضابطہ عالمگیر دستیابی کی حتمی تاریخ کا اعلان بعد میں کیا جائے گا۔