واٹس ایپ میں پرانے پیغامات کی تلاش آسان کرنے کا نیا فیچر شامل

پیغام رسانی کی سب سے مقبول عالمی ایپ ‘واٹس ایپ’ (WhatsApp) نے اپنے صارفین کے لیے پرانی گفتگو میں کسی بھی مطلوبہ پیغام کو تلاش کرنے کا عمل مزید آسان اور تیز بنانے کی تیاری کر لی ہے۔ ایک تازہ رپورٹ کے مطابق، واٹس ایپ کے آئی او ایس (iOS) بیٹا ورژن میں چیٹ کے اندر ہی ایک نیا ‘سرچ شارٹ کٹ’ متعارف کرانے پر کام جاری ہے، جس کے بعد صارفین کو پرانے پیغامات تلاش کرنے کے لیے چیٹ انفو کی اسکرین میں جانے کی ضرورت نہیں رہے گی۔

فی الحال، کسی چیٹ میں موجود پرانے پیغام تک پہنچنے کے لیے صارف کو پہلے چیٹ انفو میں جا کر سرچ کا آپشن منتخب کرنا پڑتا ہے، جو طویل گفتگو کی صورت میں وقت طلب ثابت ہوتا ہے۔ نئے فیچر کے تحت جب بھی صارف چیٹ میں اوپر کی جانب اسکرول کرتے ہوئے ماضی کی گفتگو کی طرف جائے گا، تو اس کی چیٹ اسکرین پر خود بخود ایک ‘سرچ شارٹ کٹ’ بٹن نمایا ہو جائے گا۔ یہ سہولت نہ صرف انفرادی اور گروپ چیٹس بلکہ واٹس ایپ چینلز کے لیے بھی پیش کی جا رہی ہے تاکہ صارفین پرانی پوسٹس اور اپ ڈیٹس آسانی سے ڈھونڈ سکیں۔ فی الوقت یہ فیچر بیٹا مرحلے میں زیرِ آزمائش ہے اور جلد ہی اسے دنیا بھر کے عام صارفین کے لیے رول آؤٹ کر دیا جائے گا۔