واٹس ایپ نے کم عمر بچوں کیلئے نیا فیچر تیار کر لیا

انسٹنٹ میسجنگ ایپلی کیشن واٹس ایپ نے 13 برس سے کم عمر صارفین کے لیے نیا فیچر متعارف کرانے کا اعلان کیا ہے جس کے تحت بچے والدین کی اجازت سے پلیٹ فارم استعمال کر سکیں گے۔

واٹس ایپ کے مطابق یہ اقدام کم عمر صارفین کو پلیٹ فارم کی فیملی کا اہم حصہ تسلیم کرتے ہوئے کیا گیا ہے۔ کمپنی کا کہنا ہے کہ نئے فیچر کے ذریعے بچوں کو محفوظ انداز میں ایپ استعمال کرنے کا موقع فراہم کیا جائے گا۔

یہ فیچر ایک ایسے وقت میں متعارف کرایا جا رہا ہے جب دنیا بھر میں نوجوانوں کو موبائل فون اور سوشل میڈیا ایپس کے ممکنہ خطرات سے متعلق خدشات میں اضافہ ہو رہا ہے۔

واٹس ایپ کے مطابق ’پیرنٹ مینجڈ‘ اکاؤنٹس والدین کے فیڈبیک کی بنیاد پر تیار کیے گئے ہیں۔ متعدد والدین نے کمپنی کو آگاہ کیا تھا کہ ان کے کم عمر بچے ایپ استعمال کرنا چاہتے ہیں اور اس کے لیے محفوظ طریقہ کار ہونا چاہیے۔

نئے ضوابط کے تحت والدین یا سرپرست بچوں کے اکاؤنٹس بنائیں گے اور انہیں خود مینج کریں گے جبکہ بچوں کے اکاؤنٹس والدین کے اکاؤنٹس سے منسلک ہوں گے تاکہ ان کی سرگرمیوں پر نگرانی ممکن ہو سکے۔

کمپنی کا کہنا ہے کہ اس فیچر کا مقصد بچوں کے لیے زیادہ محفوظ اور ذمہ دارانہ ڈیجیٹل ماحول فراہم کرنا ہے۔