واٹس ایپ صارفین کے لیے ویڈیو کالز بارے نیا فیچر جلد متعارف کرائے گا

دنیا کی مقبول ترین میسجنگ ایپ واٹس ایپ اپنے صارفین کے لیے ایک نیا اور انتہائی مفید فیچر متعارف کرانے کی تیاری کر رہا ہے، جس کے تحت وائس اور ویڈیو کالز کے دوران ‘نوائس کینسلیشن’ (Noise Cancellation) کی سہولت فراہم کی جائے گی۔ یہ جدید ٹیکنالوجی کال کے دوران پس منظر میں موجود غیر ضروری شور، جیسے ٹریفک کی آواز، ہجوم کا شور یا تیز ہوا کے تھپیڑوں کو خودکار طور پر کم کر دے گی، جس سے صارف کی آواز دوسرے شخص تک زیادہ صاف اور واضح انداز میں پہنچ سکے گی۔

اس فیچر کی خاص بات یہ ہے کہ یہ آپ کو سامنے والے کی آواز صاف سنانے کے بجائے آپ کی آواز کو فلٹر کر کے دوسروں تک پہنچانے میں مدد دے گا، یعنی اگر آپ کسی شور والے ماحول میں موجود ہیں تو یہ فیچر آپ کی آواز کو نمایاں کر دے گا۔ واٹس ایپ انتظامیہ کے مطابق، صارفین کو کال انٹرفیس میں ایک ‘ٹوگل’ بٹن دیا جائے گا جس کے ذریعے وہ اس فیچر کو اپنی مرضی سے آن یا آف کر سکیں گے۔ ابتدائی طور پر یہ فیچر ‘ڈیفالٹ’ کے طور پر فعال (Active) ہوگا، تاہم صارفین سیٹنگز میں جا کر اسے تبدیل کر سکیں گے۔ یہ فیچر خاص طور پر ان لوگوں کے لیے گیم چینجر ثابت ہوگا جو سفر کے دوران یا عوامی مقامات سے اہم کاروباری و ذاتی کالز کرتے ہیں۔