واٹس ایپ نے صارفین کیلئے نیا فیچر متعارف کرا دیا

کیلیفورنیا: دنیا کی مقبول ترین میسجنگ ایپ واٹس ایپ (WhatsApp) نے گروپ چیٹس کے تجربے کو بہتر بنانے کے لیے ایک جدید فیچر پیش کر دیا ہے۔ اس نئی اپ ڈیٹ کے بعد اب کسی بھی گروپ میں نئے شامل ہونے والے صارفین، اپنی شمولیت سے پہلے کی گفتگو (Chat History) تک رسائی حاصل کر سکیں گے۔

عام طور پر واٹس ایپ کے پرانے طریقہ کار میں جب کوئی صارف کسی گروپ کا حصہ بنتا تھا، تو اسے صرف اسی وقت سے میسجز نظر آنا شروع ہوتے تھے جب وہ گروپ میں شامل ہوا ہو۔ اس سے پہلے ہونے والی گفتگو اسے نظر نہیں آتی تھی، جس کی وجہ سے نئے ممبر کو گروپ میں جاری بحث یا موضوع کو سمجھنے میں مشکل پیش آتی تھی۔

نئے فیچر کے تحت اب جب کسی نئے ممبر کو گروپ میں شامل کیا جائے گا، تو پرانے ممبران کے پاس یہ اختیار ہوگا کہ وہ اسے پچھلی گفتگو سے آگاہ کرنے کے لیے پرانے میسجز شیئر کر سکیں۔ تاہم، پرائیویسی کو برقرار رکھنے کے لیے یہ اختیار گروپ ایڈمنز کے پاس ہوگا کہ وہ اس آپشن کو سیٹنگز میں جا کر ‘آن’ (On) یا ‘آف’ (Off) کر سکیں۔