واٹس ایپ میں انکوگینٹو چیٹس فیچر متعارف

دنیا کی مقبول ترین میسجنگ ایپ واٹس ایپ نے اپنے صارفین کی پرائیویسی کو مزید فول پروف بنانے کے لیے ایک انقلابی فیچر کا اعلان کیا ہے۔ ”انکوگنیٹو چیٹس ود میٹا اے آئی“ (Incognito Chats with Meta AI) نامی اس نئے فیچر کے ذریعے صارفین اب میٹا کے آرٹیفیشل انٹیلیجنس چیٹ بوٹ سے مکمل رازداری کے ساتھ گفتگو کر سکیں گے۔ اس موڈ کی خاص بات یہ ہے کہ نہ تو کوئی دوسرا شخص اور نہ ہی خود میٹا کمپنی ان پیغامات تک رسائی حاصل کر سکے گی۔

گوگل کروم کے انکوگنیٹو موڈ کی طرز پر کام کرنے والے اس فیچر میں تمام پیغامات خودکار طور پر غائب ہو جائیں گے، جس سے صارفین کا ڈیٹا مستقل بنیادوں پر محفوظ نہیں ہوگا۔ کمپنی نے واضح کیا ہے کہ یہ خصوصی سہولت صرف میٹا کے اپنے چیٹ بوٹ کے لیے ہوگی، جبکہ دیگر تھرڈ پارٹی اے آئی بوٹس کے ساتھ ہونے والی گفتگو متعلقہ کمپنیاں دیکھ سکیں گی۔

واٹس ایپ نے یہ بھی بتایا کہ اس فیچر کا مرحلہ وار اجرا شروع ہو چکا ہے اور جلد ہی یہ دنیا بھر کے تمام صارفین کی پہنچ میں ہوگا۔ مزید برآں، مستقبل میں ”سائیڈ چیٹ پروٹیکٹڈ بائی پرائیویٹ پراسیسنگ“ نامی فیچر بھی لایا جائے گا، جو ہر چیٹ کو الگ الگ انکوگنیٹو موڈ میں استعمال کرنے کی سہولت فراہم کرے گا۔