واٹس ایپ کا صارفین کو فراڈ سے بچانے کے لیے اہم اقدام

انسٹنٹ میسجنگ ایپلی کیشن واٹس ایپ نے صارفین کو آن لائن فراڈ اور اسکامز سے محفوظ رکھنے کے لیے مصنوعی ذہانت (AI) پر مبنی ایک نیا ‘اسکام الرٹ فیچر’ متعارف کرانے کا اعلان کیا ہے۔ یہ فیچر غیر محفوظ یا نامعلوم (ان نون) کانٹیکٹس سے موصول ہونے والے پیغامات کے گفتگو کے انداز اور لسانی اشاروں کا تجزیہ کر کے ممکنہ فراڈ کی بروقت نشاندہی کرے گا۔ اگر سسٹم کو کسی چیٹ کے مشکوک یا فراڈ ہونے کا شبہ ہو تو وہ فوری طور پر چیٹ میں ایک انتباہی وارننگ ظاہر کرے گا۔ یہ انتباہ صرف صارف کو نظر آئے گا جبکہ دوسرے شخص کو اس کا بالکل علم نہیں ہوگا، جس کے بعد صارف کو متعلقہ نمبر کو بلاک، رپورٹ کرنے یا گفتگو جاری رکھنے کا مکمل اختیار حاصل ہوگا۔

صارفین کی رازداری اور پرائیویسی کو مدنظر رکھتے ہوئے کمپنی نے واضح کیا ہے کہ اس فیچر کو صارفین خود اپنی مرضی سے ایکٹیویٹ کر سکیں گے۔ ایکٹیویٹ ہونے کے بعد ایپ ڈیوائس پر ہی ایک ‘مشین لرننگ ماڈل’ ڈاؤن لوڈ کرے گی جو پیغامات کا تمام تر تجزیہ براہِ راست فون پر آن ڈیوائس (On-device) کرے گا۔ اس پروسیس کے دوران چیٹ کا کوئی بھی مواد واٹس ایپ، میٹا یا کسی تیسرے فریق کو نہیں بھیجا جائے گا اور اینڈ ٹو اینڈ انکرپشن مکمل طور پر برقرار رہے گی۔