واٹس ایپ نے اینڈرائیڈ بِیٹا صارفین کے لیے نیا فیچر متعارف کروا دیا

کیلیفورنیا: دنیا کی سب سے مقبول انسٹیوٹ میسجنگ ایپلی کیشن واٹس ایپ نے اپنے صارفین کو آن لائن فراڈ اور مشکوک پیغامات سے محفوظ رکھنے کے لیے ایک نیا ’اسکیم الرٹ‘ (Scam Alert) فیچر متعارف کرایا ہے۔

یہ نیا سیکورٹی فیچر فی الحال اینڈرائیڈ کے مخصوص بیٹا صارفین (ورژن 2.26.34.1) کے لیے دستیاب ہے۔ ’اسکیم الرٹ‘ کسی بھی نامعلوم نمبر سے موصول ہونے والے ایسے پیغامات پر متحرک ہوگا جسے نظام مشکوک سمجھے گا، اور فوراً صارف کی اسکرین پر الرٹ جاری کر دے گا۔ اس موقع پر صارف کو یہ اختیار حاصل ہوگا کہ وہ اس نمبر کو بلاک اور رپورٹ کرے یا اسے ’ٹرسٹڈ‘ (قابلِ اعتماد) قرار دے کر گفتگو جاری رکھے۔

اگر صارف کسی چیٹ کو ٹرسٹڈ قرار دیتا ہے تو وہ فیچر کی درستگی (Accuracy) کو مزید بہتر بنانے کے لیے آخری 5 پیغامات واٹس ایپ کو بھیجنے کی اجازت دے سکتا ہے۔ تاہم میٹا نے واضح کیا ہے کہ یہ فیچر اختیاری (Optional) ہوگا جسے صارفین سیٹنگز میں جا کر مینوئلی فعال کر سکیں گے۔ اس فیچر میں ‘آن ڈیوائس مشین لرننگ’ کا استعمال کیا گیا ہے، یعنی پیغامات کا مواد صارف کی ڈیوائس سے باہر نہیں جاتا۔ میٹا کی جانب سے تمام عام صارفین کے لیے اس فیچر کی حتمی ریلیز کی تاریخ کا اعلان جلد متوقع ہے۔