آئی فون صارفین کے لیے واٹس ایپ میں تھرڈ پارٹی اے آئی ایجنٹس کی انٹری

پیغام رسانی کی سب سے بڑی عالمی ایپ ‘واٹس ایپ’ نے اپنے پلیٹ فارم کو مزید وسیع کرتے ہوئے آئی فون (iOS) صارفین کے لیے ‘تھرڈ پارٹی ایجنٹس’ (Third-party Agents) سے براہِ راست چیٹ کی سہولت کا بیٹا ٹیسٹنگ فیچر متعارف کرانا شروع کر دیا ہے۔ ٹیکنالوجی ویب سائٹ ‘وی بیٹا انفو’ (WABetaInfo) کے مطابق واٹس ایپ کے تازہ ترین بیٹا ورژن (26.37.10.70) میں صارف کو سیٹنگز میں جا کر ایک وقت میں زیادہ سے زیادہ 5 بیرونی ایجنٹس یا اے آئی بوٹس شامل کرنے کا اختیار دیا جا رہا ہے۔

اس فیچر کو فعال کرنے کے لیے واٹس ایپ صارف کو ایک مخصوص ‘API Key’ فراہم کرتا ہے، جسے تھرڈ پارٹی سروس کے ساتھ منسلک کر کے ایجنٹ کو چیٹ لسٹ میں ایک عام کانٹیکٹ کی طرح شامل کیا جا سکتا ہے۔ اس فیچر کی مدد سے صارفین مختلف ڈرافٹس تیار کرنے، نوٹس بنانے اور دیگر انتظامی امور کے لیے مصنوعی ذہانت (AI) یا دیگر مطابقت رکھنے والے بوٹس سے مستفید ہو سکیں گے۔ پرائیویسی کے حوالے سے واٹس ایپ نے واضح کیا ہے کہ یہ ایجنٹس صرف وہی پیغامات پڑھ سکیں گے جو صارف بذاتِ خود ان کے ساتھ شیئر کرے گا، تا ہم ان کے ساتھ ہونے والی گفتگو عام واٹس ایپ چیٹس کی طرح ‘اینڈ ٹو اینڈ انکرپٹڈ’ نہیں ہو گی۔ فی الحال یہ فیچر مخصوص ممالک کے محدود آئی او ایس بیٹا صارفین کے لیے دستیاب ہے، جسے جلد عام صارفین کے لیے رول آؤٹ کر دیا جائے گا۔