واٹس ایپ پر صارفین کی پرائیویسی بہتر بنانے کیلئے نیا فیچر متعارف

واٹس ایپ نے صارفین کی پرائیویسی اور سکیورٹی کو مزید مضبوط بنانے کے لیے نیا فیچر “اسٹرکٹ اکاؤنٹ سیٹنگز” متعارف کرایا ہے۔ کمپنی کے مطابق یہ فیچر خاص طور پر صحافیوں، عوامی شخصیات اور آن لائن انفلوئنسرز جیسے صارفین کے لیے ڈیزائن کیا گیا ہے جو سائبر اٹیکس، اسپائی ویئر یا دیگر ڈیجیٹل خطرات کے زیادہ حساس ہیں۔

نئی سیٹنگ فعال کرنے پر صارف کے اکاؤنٹ میں خودکار طور پر سخت پرائیویسی کنٹرولز نافذ ہو جاتے ہیں، جن کے تحت نامعلوم رابطوں سے بھیجی جانے والی میڈیا فائلز اور اٹیچمنٹس بلاک ہو جاتے ہیں، جس سے ممکنہ نقصان یا خطرناک مواد پہنچنے کے امکانات کم ہو جاتے ہیں۔

واٹس ایپ نے بتایا کہ فیچر فعال ہونے کے بعد صارف کا اکاؤنٹ لاک ڈاؤن موڈ میں منتقل ہو جائے گا، جس سے کچھ فنکشنز محدود ہو جاتے ہیں لیکن مجموعی طور پر صارفین کو زیادہ محفوظ تجربہ حاصل ہوتا ہے۔ صارفین اسے Settings → Privacy → Advanced کے ذریعے فعال کر سکتے ہیں۔

کمپنی نے یہ بھی بتایا کہ فیچر مرحلہ وار رول آؤٹ ہوگا اور آنے والے ہفتوں میں دنیا بھر کے صارفین کے لیے دستیاب ہو جائے گا۔

اس کے علاوہ، واٹس ایپ نے اپنے سیکیورٹی انفراسٹرکچر میں بہتری کی ہے، جس میں ایپ کے اہم کوڈ کو Rust پروگرامنگ لینگویج میں منتقل کیا گیا تاکہ تصاویر، ویڈیوز اور میسجز کو محفوظ اور مستحکم طریقے سے ہینڈل کیا جا سکے۔