واٹس ایپ سٹیٹس میں صارفین کیلئے انتہائی کار آمد فیچر متعارف

واٹس ایپ کی جانب سے سٹیٹس استعمال کرنے والے صارفین کے لیے ایک اہم اپ ڈیٹ پر کام کیا جا رہا ہے، جس کے تحت سٹیٹس پرائیویسی کو مزید بہتر بنایا جائے گا۔ رپورٹس کے مطابق اس نئے فیچر کا مقصد صارفین کو زیادہ کنٹرول فراہم کرنا اور ان کی پرائیویسی کو مؤثر انداز میں محفوظ بنانا ہے۔

نئے فیچر کے ذریعے صارفین یہ طے کر سکیں گے کہ ان کا سٹیٹس کن افراد کے ساتھ شیئر ہوگا اور آیا ان کی پوسٹ کو ری شیئر کیا جا سکتا ہے یا نہیں۔ یہ فیچر بالخصوص ان صارفین کے لیے مفید ثابت ہوگا جو ہر سٹیٹس پوسٹ کرنے سے قبل پرائیویسی سیٹنگز میں تبدیلی کرتے ہیں۔

رپورٹ کے مطابق یہ نیا فیچر سٹیٹس مینو میں شامل کیا گیا ہے، جہاں Audience کے نام سے ایک نیا آپشن نظر آئے گا۔ اس آپشن پر کلک کرکے صارفین اپنی مرضی کے مطابق پرائیویسی سیٹنگ منتخب کر سکیں گے، جن میں My Contacts، Only Share With اور Except شامل ہیں۔

واٹس ایپ کی جانب سے مخصوص کانٹیکٹس کو شامل یا خارج کرنے کی سہولت بھی فراہم کی جا رہی ہے۔ تاہم یہ فیچر فی الحال بیٹا ورژن میں دستیاب ہے، جس کے باعث یہ کہنا قبل از وقت ہے کہ اسے کب تک تمام صارفین کے لیے متعارف کرایا جائے گا۔