واٹس ایپ نے اسٹیٹس پر نیا پرائیویسی چیک فیچر متعارف کروا دیا

پیغام رسانی کی مقبول ایپ واٹس ایپ نے اپنے اسٹیٹس فیچر میں ایک نیا پرائیویسی چیک آپشن متعارف کرا دیا ہے، جس کے ذریعے صارفین باآسانی جان سکیں گے کہ ان کی اسٹیٹس اپ ڈیٹس کون دیکھ سکتا ہے اور کس نے دیکھی ہیں۔

واٹس ایپ کے مطابق یہ نیا فیچر بیٹا ورژن 2.26.2.9 میں شامل کیا گیا ہے، جو صارفین کو اسٹیٹس کی پرائیویسی سیٹنگز، ناظرین کی مکمل تفصیلات اور ری شیئر سے متعلق اصولوں کو ایک ہی جگہ واضح انداز میں دیکھنے کی سہولت فراہم کرتا ہے۔

اس فیچر سے قبل صارفین کے لیے یہ جاننا مشکل تھا کہ اسٹیٹس کس کے ساتھ شیئر کی گئی ہے یا کون اسے آگے شیئر کر سکتا ہے، تاہم نئے پرائیویسی چیک آپشن کے ذریعے تمام معلومات ایک خلاصہ صفحے پر دستیاب ہوں گی۔

واٹس ایپ اسٹیٹس کے مینو میں موجود Audience آپشن پر کلک کرنے سے صارفین کو یہ واضح طور پر دکھائی دے گا کہ اسٹیٹس تمام رابطوں کے لیے ہے یا منتخب افراد تک محدود رکھی گئی ہے، جبکہ کسی بھی استثناء کو بھی نمایاں طور پر ظاہر کیا جائے گا۔