واٹس ایپ نے سٹیٹس فیچر میں اہم سہولت متعارف کرا دی

انسٹنٹ میسجنگ ایپلی کیشن واٹس ایپ نے اپنے صارفین کے لیے ایک نیا فیچر متعارف کرایا ہے، جس کے تحت اب اسٹیٹس اپ ڈیٹس پر میوزک (موسیقی) کے دورانیے کی مدت میں اضافہ کر دیا گیا ہے۔ واٹس ایپ کی تمام نئی تبدیلیوں پر نظر رکھنے والی ویب سائٹ ‘واٹس ایپ بیٹا انفو’ (WA Beta Info) کے مطابق صارفین اب اپنے اسٹیٹس میں 30 سیکنڈز تک طویل میوزک کلپس شامل کر سکیں گے۔

واضح رہے کہ واٹس ایپ اسٹیٹس کا فیچر انسٹاگرام اسٹوریز کے متبادل کے طور پر استعمال کیا جاتا ہے اور اس سے قبل اسٹیٹس میں میوزک شامل کرنے کی حد صرف 15 سیکنڈز تک محدود تھی۔ اس جدید اپ ڈیٹ کے بعد صارفین کسی بھی تصویر کے ساتھ اپنی پسندیدہ موسیقی کا 30 سیکنڈ طویل حصہ منتخب کر کے پوسٹ کر سکیں گے یا پھر صرف میوزک کلپ کو براہِ راست اپنے اسٹیٹس کے طور پر بھی شیئر کر سکیں گے۔